B-teikning: Oversiktsplanar for trasé, plan og profil
B-teikningar omfattar oversiktsplanar for trasé, plan- og profil. På denne sida finn du eksempel på korleis slike teikningar kan utformast.
Utforminga av teikningar skal følgje krav i «STY-602913 prosjektspesifikk dokumenthåndteringsprosedyre (PDP)» og generelle krav til BIM og geomatikk.
Oversiktsteikninga skal gi oversikt og vere referanse for C- og D-teikningane. Informasjonsmengda på B-teikningane bør tilpassast deretter. Oversiktsteikningane skal vise plan, eventuelt med profildel. Det blir brukt kartgrunnlag med tilpassa nøyaktigheit og innhald, slik at sjølve utbyggingstiltaket kjem fram og det blir god lesbarheit. Målestokken kan vere frå 1:2000 til 1:10 000, unntaksvis med endå mindre målestokk.
I prosjekt med stor geografisk utstrekning bør ei av teikningane vise heile det aktuelle planområdet og plasseringa i forhold til tettstader og vegnett. Som grunnlag kan òg ortofoto brukast.
I prosjekt med fleire teikningar bør kartet orienterast slik at banens lågaste kilometer er til venstre på teikninga. I prosjekt med behov for berre éi oversiktsteikning kan kartet orienterast mot nord.
Teikninga skal vise jernbanetraséen for det valde alternativet med rett nemning. Profilnummer skal førast på med valt intervall, og det skal setjast på parsellmerke. Planen skal ha tekst for stasjonar, tunnelar, elvar og konstruksjonar. Alle nødvendige tilkomstar, rømningsvegar, deponi, massetak, riggområde og tekniske område skal førast inn. Kommunegrenser med kommunenamn skal vere påført, saman med retning til nabostasjonar og annan viktig informasjon.
Teikninga inneheld data frå ulike fag, noko som betyr at oversiktsteikninga må utarbeidast som eit resultat av tverrfagleg samarbeid.
Detaljeringsgraden må tilpassast dei ulike planfasane.
Utgreiing
B-UT-OB Oversiktsteikning
B-UT-OB Oversiktsteikning
Hovudplan
B-HP-OB Oversiktsteikning
B-HP-OB Linjekart. Målestokken er 1:5000, og kartet har redusert synlegheita til koter og andre kartdata, medan prosjekterte data er gjort tydelegare med raud farge. Traseane er viste i raud farge med påførte spordata både horisontalt og vertikalt. Teikninga gir eit godt oversyn over tiltaket og gir god moglegheit til å orientere seg.
Detaljplan
B-DP-OB Oversiktsteikning. Teikninga viser ein oversikt over prosjektet i målestokk 1:2500. Det er valt å vise plan- og profilteikning av sportraséen for å synleggjere omfanget av tiltaket. Beredskapsplass og eventuelle deponi/riggområde og anleggsvegar blir vist. Sporet er teikna i to fargar, raud (242) eller blå (170), med tjukkleik på 0,5 mm.
B-DP-OB Oversiktsteikning. Teikninga viser ein oversikt over Frogner stasjon i målestokk 1:5000. Det er mange detaljar og mykje tekst på teikninga, noko som kan gjere ho litt overlessa med informasjon. Det manglar påføring av anleggsvegar og riggområde, bruer og stasjonsområde, noko som burde vore med. Kartutsnittet dekkjer også store område som ikkje inngår i prosjektet. Dette gjer teikninga unødvendig stor og tung, og bør unngåast.
B-DP-OB Oversiktsteikning. Teikninga er laga i målestokk 1:3000 og viser eit anlegg i sentrum der kartet berre viser veg- og vassinformasjon. Det er brukt fargar og gråtonar for å gjere kartet lettlese. Atkomst, omlagt veg, parkeringsplass og riggområde er vist. Trasédata er ikkje vist, men kartutsnitt og kartreferansar til detaljkarta er påført.
Oversiktsteikning. Teikning over Jensrud kryssingsspor i målestokk 1:5000. Teikninga er vist med eit stort kartutsnitt utanfor det prosjekterte området, og det burde vore vurdert ein mindre målestokk for å gjere teikninga meir lesbar. Stadnamn er påført, og anleggsvegar og riggområde er vist.
Oversiktsteikning. Teikning i målestokk 1:1000 av innkøyringa til eit stasjonsområde med ein del detaljar og ei konstruksjon over ei elv. Teikninga er vist med blå farge på sporet. Det er ei eiga teiknforklaring i ramma nedst på teikninga.
Byggeplan
B-BP-OB Oversiktsteikning. Viser eksisterande og nye spor med omkringliggjande arealbruk på gråtonekart. For å få med mest mogleg på kvar teikning, er ho delt i to, med kvar sin del av traseen.